في خاطري كلمتين

Shadow · #1 08/08/08

السلام عليكم

الشاعر فهد المساعد

قصيدة في خاطري كلمتين

مــن عــز نـومي صحيت وشفت في عيني
دمعٍ تهادى على جفني وانا غافي

سترت دمعي بكمّي قبل يغريني
وأخذت هذا الجسد من باقي لحافي

وسريت تايه ورى خطوات رجليني
لاالوجه وجهي ولاأوصافي هي أوصافي

أمشي وأقول لطريقي لاتودّيني
لعيون ناسٍ تبي تدري عن الخافي

أمانتك ....خلّها مابينك وبيني
خابرك يالدرب خوّة عمر وسنافي

ماودّي الناس تدري وش يبكّيني
كرامة النفس ورث أبوي واسلافي

أمشي وأحس الخناجر في شراييني
والبرد يمشي وراي وينهش اطرافي

وحيد والليل بردونه يغطّيني
تقول كن البلد روّح بها السافي

إلين ماأوحيت لي صوت يناديني
صوت أعرفه مثل ماأجهل وش خلافي

قمت أتلفّت وانادي لاتخلّيني
ماغيره...الصوت هذا صوته الدافي

ولمحت زوله من أقصى الدرب لافيني
مدري وش اقول لكن حي هاللافي

تعال...شف غيبتك كيف أثّرت فيني
تعال....شفني وانا أغرق عقب مجدافي

تعال...خذني ورحّـــبّــي من عناويني
تعبت أعدّي على جمرك وانا حافي

تعال واقطف بصوتك زهرة سنيني
كل المواعيد عقبك شمعها طافي

تعال وازرع خصل شعرك بكفّــيــني
بضمها لين أحس بليلك الظافي

تعال وش فيك خايف؟ انت ناسيني؟
قطعت صوتي عليك وطال ميقافي

حتى بديت أشعر إن الحب معميني
وإن أنت حلم عثى فيني وانا غافي

لكن امانة ترى اللي فــيّ كافيني
إن رحت منك كذا مارحت متعافي

بــصدّق الحلم واحذر لاتصحّيني
في خاطري كلمتين إن قلتها كافي

أمانة الله عليك إن غبت عن عيني
لايكون قلبك مثل قلب الزمن جافي

مع كل دمعة تــذكّـــر رعشة يديني
ومع كل ضحكة تــذكّــر قلبي الوافي