حزاية من حزاوي اهلنا ( مرت الاخو وفعايلها الشينة )

كويتيه ماتهاب · #1 16/07/08

كان يامكان في سالف العصر والاوان ولا يحلى الكلام الا بذكر النبي عليه الصلاة والسلام ( عليه افضل الصلاة والسلام )
كان في ولد واخته يتامة لا ام ولا ابو عايشين لبعضهم في حب والفة كبرو وصار الولد رجال والبنت كبرت وقالت لاخوها ياخوي ليش ماتتزوج وتجيب اعيال نتونس معاهم الاخو تفاجأ بطلبها وقال لا ياوخيتي ماابي مره تظلمج وتنكد عليج عيشتج خلينا مع بعض وخلي الشيطان بعيد عنا
ادور لك انا مره حليوه ومافيها الشر ياخوي قال لا لا لاتحاولي
لحت عليه كثير لدرجة انه قال بشرط وايش الشرط ياخوي آمر ؟
عندها ذاك الوقت صندوق من الحديد حاطة فيه العاب لها محتفظة فيهم واخوها أخذ الصندوق وارفعه بآخر رازنه في الغرفة ( يعني رف من الطين ) وقال لها اذا قدرتي تنزليه انا اتزوج وامري لله وطلع لشغله
فكرت الاخت اشلون تنزل الصندوق لان الرازنه عاليه وهي مره ماتقدر لحالها اشلون اشلون ؟؟؟
حطت مسند على مسند وصندوق على صندوق وفراش على فراش الين ماوصلت الرازن الي عليها الصندوق وشوي شوي نزلت الصندوق بعد جهد جهيد وفرحت فرح ماعقبه فرح عشان بتفاجأ اخوها وبأذن الله يتزوج
وصل اخوها البيت مساج الله بالخير ياوخيتي
مساك الله بالنور شوف الي بالارض ياخوي
الصندوق !!!مين الي نزله معاج؟
ماحد نزله معاي انا حاولت وحاولت هااااااااااا الوعد متى انشاء الله ؟
قال دورلي مره وامري لله فرحت الاخت والدنيا مو سايعتها من شدة الفرح عشان بتجي البيت معاها وحدة تتونس معاها وبالفعل تزوج الاخو وعاشو عيشة حلوة هنية تقاسمت الاخت مع الزوجة اشغال البيت هذي تطبخ وهذي تخم وتنظف البيت وهذي تغسل الثياب وهذي تنشرهم بس الزوجة ملت من وجود الاخت معاها بالبيت واهتمام زوجها بأخته بدت تدبر المكايد عشان الزوج يكره اخته وهي تطبخ ذاك اليوم مر بالشارع بياع بيض ينادي ويقول ( من يشتري بيض الحملي ومن يشتري بيض الهزلي ومن يشتري بيض السمني ) ويردد سمعت الزوجة وطلعت عند باب البيت ووقفت الرجال ( تعال يالاخو اعطيني من هالبيض وهالبيض وهالبيض ) اهي اكلت بيض الهزلي عشان تصير رشيقة واعطت زوجها بيض السمني وصار سمييييييييييييييييييييين واعطت اخت زوجها بيض الحملي وحملت البنت وكبر بطنها وظلت ماتطلع من دارها ومتخبي من اخوها ومتخوفه الى ان قالت الزوجة اختك اعوذ بالله مسويه منكر حتى ادخل عليها الدار شوفها اشلون صار بطنها ماصدها وسكتها حرام عليج اختي عفيفة شريفة ماتسوي هالسواة قالت روح واتأكد بنفسك
دخل عليها اشلونج ياوخيتي
الحمد لله
ليش ماتطلعين وتجلسين معنا بصحن الدار ؟
بس انا شوي تعبانة
وطاحت عين الاخو على بطن اخته اشلون صاير كبير وهي مستحيه وتخبيه متفاجأ ويتذكر كلام زوجته وصدق الكلام وقرر ان ياخذ اخته في نزهه عشان يتخلص منها ومن عارها قال لها تجهزي بكرة من الصبح بوديج نزهه توسعين صدرج فيها
اصبح الصبح وجهزت الاخت الماي والزاد وطلعت مع اخوها يمشون يمشون يمشون تقول لأخوها خلينا نجلس تعبت يقول لها بعد اشوي ونوصل الى ان وصلت حدها من التعب وقالت خلاص مااقدر وجلست عند شجرة وخذها النوم وماصدق اخوها انها نامت ويفر من عندها ويرجع البيت المشكلة انها ماتدل ترجع لانه بعد فيها بعيييييييييييييييييد عن الحي الي يسكنونه صحت البنت من النوم وهي تتلفت يمين وشمال تدور الاخو العزيز وينه ؟ اخوي اخوي وينك ظلت تاكل من السدرة الي هي عنها وتشرب من ماي الغدير وبعدين ولدت وجابت طيور اثنين حلوين وسالفت لهم عن اخوها وعن حكايات مرت اخوها معاها واشلون اظلمتها وانها السبب في ترك اخوها لها وعلمتهم وين يسكنون هم وعن شكل بيتهم وبدو يطيرون وعرفو وين بيتن اهل امهم ( بيت الخال ) وياقفون على جدار السطح ويقولون ياخالنا يامرمره ياطائع شور المره ترى البنيه ماحملت الا من بيض الحملي وترى المرة ماهزلت الا من بيض الهزلي وترى الخال ماسمن الا من بيض السمني يرددونها مرات ومرات سمعت مرت الخال وبدت تهشهم هش هش هش ويرجعون مرة ثانية ويقولون وهي تهشهم خايفة يسمع الزوج وتروح في داهيه وبالفعل رجع الخال من الشغل وقال لزوجته حطي الغدا وهي تزين الغدا سمع كلام الطيور ووقف يبغى يتأكد من المتكلم شافته زوجته وقالت هذولا طيور يخربطون تعال تغدا اتركهم هش هش هش حس الخال بشي تخفيه زوجته وقال خليني اسمعهم للنهايه وصرخ في وجهها وقصو على خالهم القصة وطلب منهم يدلونه على مكان الام قالو تعال احنا نطير وانت تمشي ورانا وصل الخال للاخت المظلومة وعانقها وهم الاثنين يبكون ويتأسف منها وصدقيني ماعرفت السالفة الا من الطيور الحين وانتي السبب تلحين علي اتزوج اتزوج شوفي الزواج ايش يسوي مو انا قلت لج ماصدقتيني اخذها ورجعو للبيت وطلب من زوجته تخبز له خبز بالتنور وراحت تحط العجينه بالتنور ويرميها في التنور وتخلصو منها بس هالمرة عاد دورت البنت زوجة خيرة دينة لاخوها وعاشو عيشة هنية وبسعادة